వివాదాస్పద దీవిలో లాంగ్ రేంజ్ యుద్ధ విమానాలను మోహరించిన చైనా

దక్షిణ చైనా సముద్రంలో ఆధిపత్య పోరు మరింత తీవ్రమవుతోంది. వివాదాస్పద పారాసెల్ దీవుల్లో చైనా ఈ నెలలో రెండు అత్యాధునిక హెచ్-6 బాంబర్లను మోహరించినట్లు ఉపగ్రహ చిత్రాల ద్వారా వెలుగులోకి రావడం తీవ్ర కలకలం రేపుతోంది. ఈ చర్య ద్వారా ప్రత్యర్థులకు, ముఖ్యంగా అమెరికా, ఫిలిప్పీన్స్‌లకు తమ సైనిక పాటవాన్ని చాటాలన్నదే బీజింగ్ వ్యూహంగా కనిపిస్తోందని రక్షణ రంగ నిపుణులు విశ్లేషిస్తున్నారు.

ఫిలిప్పీన్స్‌తో ఉద్రిక్తతలు కొనసాగుతుండటం, తైవాన్ సమీపంలో కార్యకలాపాలు ముమ్మరం చేసిన నేపథ్యంలో, ఈ వారాంతంలో సింగపూర్‌లో జరగనున్న ప్రతిష్ఠాత్మక షాంగ్రి-లా భద్రతా సదస్సుకు ముందు ఈ పరిణామం చోటుచేసుకోవడం ప్రాధాన్యతను సంతరించుకుంది. 2020 తర్వాత పారాసెల్స్‌లోని వుడీ ద్వీపంలో ఈ లాంగ్ రేంజ్ హెచ్-6 బాంబర్లు కనిపించడం ఇదే ప్రథమం. ఈ బాంబర్లు అణ్వస్త్ర సామర్థ్యం కలిగిన క్షిపణులను కూడా ప్రయోగించగలవని తెలుస్తోంది.

"వాస్తవానికి చైనా తన లాంగ్ రేంజ్ బాంబర్లను పారాసెల్ దీవుల్లో మోహరించాల్సిన తక్షణ అవసరం లేదు. ఇది కేవలం బలప్రదర్శన మాత్రమే. అమెరికా, ఫిలిప్పీన్స్ సహా ఇతర దేశాలకు పరోక్ష హెచ్చరికలు పంపేందుకే ఈ చర్య" అని సింగపూర్‌కు చెందిన ఎస్ రాజరత్నం స్కూల్ ఆఫ్ ఇంటర్నేషనల్ స్టడీస్‌లో డిఫెన్స్ స్కాలర్ కొలిన్ కో అభిప్రాయపడ్డారు.

మే 19న తీసిన మాక్సర్ టెక్నాలజీస్ ఉపగ్రహ చిత్రాల్లో రెండు హెచ్-6 బాంబర్లతో పాటు, రెండు వై-20 రవాణా విమానాలు, ఒక కేజే-500 నిఘా, ముందస్తు హెచ్చరికల విమానం కూడా వుడీ ద్వీపంలో ఉన్నట్లు స్పష్టమైంది. ఈ విమానాల మోహరింపు ద్వారా చైనా తన వ్యూహాత్మక పరిధిని విస్తరించుకోవాలని చూస్తోందని విశ్లేషకులు భావిస్తున్నారు.

శుక్రవారం ప్రారంభం కానున్న షాంగ్రి-లా సదస్సులో అమెరికా రక్షణ కార్యదర్శి లాయిడ్ ఆస్టిన్ కీలక ప్రసంగం చేయనున్నారు. ఈ నేపథ్యంలో చైనా చర్యలు చర్చనీయాంశంగా మారనున్నాయి. దక్షిణ చైనా సముద్రంపై చైనా ఏకపక్ష వాదనలను అంతర్జాతీయ ట్రైబ్యునల్ తోసిపుచ్చినప్పటికీ, బీజింగ్ మాత్రం తన దూకుడును కొనసాగిస్తూనే ఉంది. తాజా పరిణామాలు ఈ ప్రాంతంలో ఉద్రిక్తతలను మరింత పెంచే అవకాశం ఉందని ఆందోళన వ్యక్తమవుతోంది.